Disa nga kandidatët maqedonas për president shteti nuk e shohin të arsyeshme që platformat e tyre zgjedhore, billbordet dhe videot reklamuese ti bëjnë edhe në gjuhën shqipe. Deri më tani vetëm kandidati i LSDM-së Stevo Pendarovski pothuajse të gjitha materialet i ka edhe në shqip, kurse presidenti aktual dhe kandidat i VMRO-DPMNE-së, Gjorge Ivanov dhe ai i Opsionit Qytetarë për Maqedoninë, Zoran Popovski platformat e tyre i kanë vetëm në maqedonisht. Analistët vlerësojnë se me anashkalimin e shqipes kandidatët për president shteti dëshmojnë se nuk janë kandidatë për tu përkrahur nga votuesit shqiptarë pasi që në fillim ata mohojnë votën e shqiptarëve dhe me këtë edhe gjuhën dhe kulturën e tyre.<br /><br />"Shembulli i mirë për bashkëjetesë dhe për respekt ndëretnik duhet të fillojë nga i pari i shtetit edhe pastaj ajo e gjitha reflektohet në të gjitha poret e jetës në Maqedoni. Fatkeqësisht kjo nuk po ndodh, pala maqedonase ajo anti-shqiptare edhe më tutje manifeston animozitet ndaj gjuhës shqipe, ndajë kulturës dhe kështu çdo fjali tjetër e cila mund të dëgjohet nga të gjithë ata që konkurrojnë për president, se janë për bashkëjetesë, se duan një Maqedoni multi-etnike e kështu me radhë nuk kanë vend pas mbeten vetëm parulla politike, kurse në përditshmëri atë nuk e përjetojnë qytetarët", deklaroi Ismet Ramadani -- analist politik.<br /><br />Për analistin tjetër Agim Jonunz, anashkalimi i shqipes nga kandidatët maqedonas është hipokrizi nga ana e tyre dhe partive që i kanë kandiduar.<br /><br />"Nëse nuk përdorin gjuhën shqipe në paraqitjet e tyre LIVE të paktën në programet e paguara politike nëpër media duhet ta bëjnë këtë. Ky akt sipas meje është vetëm një gjest i një vullneti të mirë i cili vetë kandidatët i vendosë në një hipokrizi për të qenë 'baba' i të gjithë qytetarëve të Maqedonisë, d.m.th të jesh 'baba' duhet të kuptosh edhe djalin e vogël, edhe të dytin por edhe më të madhin. Vlerësojë se nëse jo gjatë këtyre zgjedhjeve se veç më është vonë, gjatë zgjedhjeve të ardhshme seriozisht duhet të ndryshohet modeli i zgjedhjeve", tha Agim Jonuz -- analist politik.<br /><br />Ramadani nga ana tjetër vlerëson se presidenti aktual Ivanov me mos-përfilljen e shqipes edhe njëherë tregoi se nuk është president i të gjithë qytetarëve dhe kësaj radhe ai nuk meriton votat e shqiptarëve. Ndërkohë kandidati për president Stevo Pendarovski është kandidati i parë që platformën dhe të gjitha materialet promovuese i ka bërë edhe në shqip. Valmir Kuçi